Ahi Han Mutuk Uma 53 Iha Merkadu Taibessi

Kazu insidente insendiu nee akontese iha Kinta horiseik, maizumenus tuku 23:00 kalan otl, ahi han mutuk uma 53 iha merkadu Taibesi no membru família 356 mak sai vítima.

Oras nee daudaun sira hela provizoriu iha eis Edifísiu Kuartel Jeral Militar Portugues, hodi hetan apoiu umanitaria.

Kestaun nee hatoo husi Koordenador Jestaun Merkadu Taibessi, António Manuel de Araujo ba STL iha fatin akontese merkadu Taibessi, Sesta nee (23/12/2022).

Nia dehan, iha kalan nee kedas nia husu ekipa Jestaun Merkadu komunika direta ba ekipa bombeirus atu halo atuasaun, hodi hamate ahi inklui kontakta mos ba autoridade Polísia Nasionál Timor-Leste (PNTL), Komando Munisípiu Díli, hodi asegura lokál insendiu inklui salva vítima sira ba fatin seguru.

“Ita nia komunidade neebe hela iha nee halo negosiu, horikalan ami muda kedan ba fatin seguru. Vítima sira iha xefi familia 53 ho total ema 356,” dehan António.

Nia esplika, oras nee seidauk hatene motivu lo-loos husi akontesimentu nee, tanba presiza liu husi prosesu investigasaun mak bele deskobre, ida nee polísia mak iha kompetensia atu investiga.