ESTRADA KUAK IHA BALIDE SEIDAUK HADIA

Tinan ida resin ona, Estrada ku’ak iha área Balide besik edifísiu Diresaun Transaportes no Terrestres no Institutu Superior Kristal seidauk hadi’a.

Antes ne’e, komunidade mak hola inisiativa hodi taka ku’ak iha area ne’ebá ho raihenek no fatuk, hodi hein intervensaun husi governu, liu-liu MInisteriu Obras Publikas, maibe to’o agora seidauk rezolve.

Estrada iha area ne’e sempre akontese engarrafamentu ka macet, liu-liu iha tempu dadersan, meio dia horas almosu no loro-kraik, tanba motorista sira sempre buka dalan hodi sees ba ku’ak ne’ebe iha lo’os Estrada klaran.

Alem ne’e, be iha area ne’e mos la kanaliza ho di’ak hodi estraga nei-neik Estrada alkatroada no loron ruma situasaun ne’e sai pior liu tan.

Iha rede sosial sidadaun sira, lamenta tebes ho falta antensaun husi governu ba Estrada iha area refere, maske iha tinan 2022 nia laran governu gasta billaun rua resin ba dezenvolvimentu no rekupera ekonomia.