Iha biban ne’e Diretór Diresaun Nasionál Empregu Exteriór Filomeno Soares hateten, realizasaun programa formasaun PDB (Pre-departure Briefing) hó objektivu atu fahe informasaun kona-ba, kultura no regulamentu balun iha Australia ba traballadór sira, hodi nune’e sira bele kompriende antes tama ba servisu.
Dirizente ba diresaun ne’e mós husu ba kandidatu sira ne’ebé tuir programa formasaun PDB (Pre-departure Briefing) durante loron rua nia laran atu aproveita hó didi’ak hodi aprende, tanbá informasaun ne’ebé ekipa SEFOPE sira fahe bazeia ba regulamentu ne’ebé empregadór sira iha Australia fó.
Tempu hanesan Diretór ne’e afirma ba traballadór sira katak karik iha tempu besik ba servisu iha Australia, atu hatudu komportamentu servisu ne’ebé di’ak, labele ses husi sistema, kontaktu nafatin hó família, servisu rai osan hodi nune’e fila mai bele hadi’a ekonomia família no diversifika ekonomía nasaun.